انصار (چهارشنبې، د سنبلې ۲۹ مه) د کندهار د مېوې د جالۍ جوړولو په فابریکه کې د اورلګېدو له کبله د دې فابریکې ۵ ماشینونه، تر ۱۳۰ زره ډېرې جوړې شوې جالۍ او ډېره اندازه اومه مواد سوځېدلي دي.
د لومړنیو معلوماتو له مخې، د دې پېښې له کبله، چې د چهارشنبی په سهار وختي وشوه، تر ۳ لکه ډالرو پورې تاوان پېښ شوی خو د اور لګېدو له کبله څوک ژوبل شوي نه دي.
دا فابریکه د کندهار په صنعتي پارک کې ده او دا په وروستي یوه کال کې په دغه پارک کې د اورلګېدو درېیمه پېښه ده چې د بې احتیاطۍ او د خوندیتوب د اصولو د نه رعایتولو له کبله رامنځته کېږي.
د فابریکو خاوندان بیا وايي چې د اور وژنې یا اطفایې نشتوالی د دې سبب کېږي چې په دغه پارک کې د اور لګېدو هره پېښه ستره شي او ډېر مالي تاوان واړوي.
د مېوې د جالۍ جوړولو فابریکې مسوول حاجي عبیدالله وايي چې په فابریکه کې یې اور د برېښنا د شارتۍ له کبله بل شو.
دی وايي که د اطفایې موټر اوکارکوونکي ژر ورسېدلي وای دومره تاوان به نه و ورته اوښتی.
ده له طالب چارواکو وغوښتل چې په صنعتي پارک کې د اطفایې مرکز پرانیزي او که ځای نه لري صنعتکاران چمتو دي چې ځای ورکړي.
په کندهار کې طالب چارواکي وايي چې په دغه ولایت کې د اطفایې درې نوي مرکزونه منظور شوي چې یو به یې په صنعتي پارک کې جوړ شي.
URL تعقيب: https://www.ansarpress.com/pashto/27121
